Om oss

Kystverket

NFFs viktigaste offentlege samarbeidspartnar er Kystverket, som eig dei fleste av fyra. Kystverket har ansvar for vedlikehald og drift av desse fyra. Rundt 70 av dei 114 fyrstasjonane blir leigde ut til venneforeiningar, bedriftar eller offentlege etater. Dei fleste av desse er medlemmer i NFF.

Kystverkmusea

Kystverkmusea er Kystverkets eige etatsmuseum. Det blei formelt oppretta i 2008, og er organisert som eit nettverkssamarbeid mellom fem sjølvstendige museum: Lindesnes Fyrmuseum, Jærmuseet, Vitimusea, Museum Nord og Museene for kystkultur og gjenreising i Finmark IKS (MKGF) / Kystmuseene.

I samarbeid med Kystverket og Kystverkmusea arrangerer NFF fyrhistoriske seminar, både nasjonale og regionale. Seminarene samlar norske fyrforvaltarar og fyrvenner, og også representantar for fyrorganisasjonar i andre land.

Kulturvernforbundet

NFF er medlem av Kulturvernforbundet, som er ein paraplyorganisasjon som jobbar for å betre vilkåra for det frivillige kulturvernet. Kulturvernforbundet har 29 medlemsorganisasjoner, som alle jobbar med å ta vare på vår materielle og immaterielle kulturarv. NFF leiger kontorlokale gjennom Kulturvernforbundet i Kulturvernets hus i Oslo.

Kystleden

NFF deltek òg i det nasjonale samarbeidet med Forbundet KYSTEN, Den Norske Turistforening, Friluftsrådenes Landsforbund og Norges Padleforbund om Kystleden. Mange av fyrforeiningane som er knytte til NFF tilbyr fyrovernatting og anna tilrettelegging som ein del av dette konseptet, der det blir fokusert på enkelt, miljøvennleg friluftsliv langs kysten og på ålmentas tilgjenge til fyra.

Andre

Foreininga har vidare eit nært samarbeid med Riksantikvaren, Forbundet Kysten og fyrforeninger i nordiske land. NFF er medlem av Frivillighet Norge.